Sujet: Was soll das?

Die Epidemie isch ändlig verby,

das Coronavirus hetti gar nie solle sy.

Aber mit däre Corona-Pandemie

Setzt e ganzi Völkerwanderig y.

In hundert Johr wird me no brichte,

Wie sich Völker verschobe hänn wie in alte Gschichte.

Die Völkerwanderig foht aa in der Schwiz,

Wills zwenig Personal hett in de Spitäler und Hospiz.

D’Schwizer kaufe s’Pflägpersonal drum z’Dütschland yy.

Derno fählt als Konseqeunz de Dütsche die Ärzte-Bandi.

Die Dütsche hole unverhohle s’Pfägpersonal uss Pole.

D’Pole widerum gryffe zrugg uf dr armi Balkan.

Plötzlich müehn im Balkan neui Lütt yyne.

So groote d’Völker z’Europa als wie meh in Fluss.

D’Balkaner hänn zwor Angst vor em böse Russ,

aber kei Angst vor em schwarze Maa.

Dr Balkan nimmt drum s’Personal uss Sambia z’Afrika.

Und die in Sambia z’Afrika? Wo göhn die go Lütt stähle,

Wenn in ihrne Spitäler d’Krankepflägerinne fähle?

Es isch wie bi jedem Schneeball-System,

dr Letschti hett denn s’gross Problem.

Die z’Afrika wisse scho uss dr koloniale Zytt,

ass de Entwiggligs-Länder nüt anders blibt.

Si werde ussbüttet und sinn allewyl die Dumme.

Das hänn die Riiche z’Europa eso bestumme.

Die Corona-Pandemie isch jo sowiso e Stuss-

I verstand das nimm, I kumm nümm druss.

Die Corona-Bestimmige wächsle all paar Tag.

In jedem Kanton änderet die epidemiologisch Lag.

Ich zeig mit Zertifikat im einte Kanton, dert isch’s akzeptiert,

Nit aber im andere Kanton; s’isch e Hohn. I bi ganz verwirrt.

Links vo dr Stross im einte Kanton sinn d’Restaurant offe.

Rächts vo dr Stross im andere Kanton gschlosse. Bin ich bsoffe?

Was gilt jetzt grad? I bi total duurenand und konfus.

Isch es aktuell 3G oder 2G? Oder 2 G Plus?

Dr Bundesroot sorgt mit syne Bestimmige für Verdruss.

Und denn kunnt au no ne heimligi Verschwörig uss:

Es mischle in dr Pandemie die Mächtige mit bi däm Stuss.

Es isch dr „Bill Gates“, da schlau Maa, ich weiss es genau.

Dä hett sich verschwore mit dr Swisscom und Telefon-Abieter.

Alli verlange scho lang 5G für uns naivi Gmieter.

My Handy hett aber numme 4G und ich dängg: „Herjemineh!“

Wo soll i zum myne 4G das letschti G härneh?

Swisscom, Sunrise, Salt, Orange und wie si alli heisse

Hänn mer kei 5G-Zertifikat welle usstelle. So-ne Scheisse!

Die Forderig vo 5G han ich drum nit welle unterstütze,

wo numme em Bill Gates und sym Netz tuet nütze.

Bi dr Covid-Abstimmig han i Nai gstimmt zum Bundesgsetz

und bi huushoch unterläge. Es gilt also bald 5G im Netz.

Ich ha also e tüürs Smartphone mit 5G kauft,

Und gmerkt, ass das Zertifikat druff gar nit lauft.

In dr Beiz han ich ich my Zertifikat vorzeige welle,

ass ich ändlig my Bier au am Tisch darf bstelle.

My neui Smartphone isch jo mit 5G parat.

Luegt doch d’Servier-Tochter numme uf’s Zertifikat

und seit, es bruuchi neuerdings 2G sytt e paar Tag.

Dä schtohsch doo so blöd wie-ne Esel am Hag.

I bi zrugg in Handy-Lade und will e Smartphone mit 2G.

Sait e Zürcher Schnuure: „Söttigi Smartphone tuets nümm geh“.

Denn han ich s’Ussmass vo däre Verschwörig voll begriffe.

wo die „Quanon“ z’Amerika scho lang vo de Dächer pfyffe.

Derhinter stäggt dr Bill Gates, da Grisse,

Wo uns will manipuliere und bschisse.

Do wirds eim ganz Angst und Bang.

Dä Microsoft-Chef will jo scho lang,

Ass alli schaffe in syner „Office-World“ im „home“.

Numme drum gitts gar kei 2G uf de Smartphone.

Was ich im „Home Office“ am Computer tue parliere,

ka dä „Gates“ z’Amerika genau kontrolliere und studiere.

Die gheimi Verschwörig gitt mer kei Rueh,

was ich uf allne Soziale Medie verbreite tue.

Numme wenig kenne die wirgglige Zämmehäng,

wo d’Mainstream-Medie nit publiziere wänn.

Drum han ich d’Wohrheit muetig uf dä Zeedel gschribe,

ass alli wüsse, wies dr Bill Gates und d’Swisscom triibe.

My Zeedel, wo macht, ass die Verschwörig nit ka glinge,

han ich i an dr Fasnacht welle unter d’Mensche bringe.

Aber d’Regierig will jo verhindere, ass sich Ufklärti zämmerotte

und hett drum – numme wäg mym Zeedel  – dr Cortège verbotte.

Ich ha dr Bewys: Dä Virus ka numme vo China koh!

Uf China hänn d’Russe e kranki Flädermuus gschickt, hejoo.

D’Chinese solle uusefinde, worum das arme Tier gstorbe-n-isch.

Aber d’Wohrheit isch, d’Russe wisse, ass in däm Tier e Virus isch.

Dä glai Virus soll die ganz Wält umsveregge aastägge und das gly.

Verschrecke soll me ab däre Pandemie. Die Angst isch ydrügglig gsy.

Tscheggsch-es? Dr Gates hilft em Putin, wenn d’Russe d’Ukraine bsetze.

Dä Virus soll uns verunsichere und tuet unseri Meinigsfreiheit verletze.

Jetzt isch doch au Dir klar, worum mir Corona hänn müesse erliide:

D‘ Russe hänn das gmacht zum d’Ukraine überfalle und dert blibe.

Die Pandemie soll uss uns mache e guetgläubigi, folgsami Horde!

Drum bin ich als FCB-Fän vo Rot-Blau zum Fan vo Blau-Gelb worde.