KI-Sujet    (uf Baseldytsch: kai Sujet)

Dä Zeedel wär doch ganz aifach gschribe

Wenn me das mit Tschät-Tschipiti (Chat-GPT) könnt betribe.

Aber die kynschtlig Intelligänz schribt numme-n-uf Hochdytsch, herrjeh.

Bis die au no Baseldytsch parliere ka, muess no einiges gscheh.

——–

S’hett emoll e Maa sich gfroggt,

wer die Wält denn eso bloggt.

Er bruucht nit lang und kunnt zum Schluss:

Di Soziale Medie verzelle z’vill Schtuss.

Jedi weichi Biire gitt sy Seich und amänd

schaffts die einti sogar zum Presidänt.

Drum hetts z’vill krummi Lütt in dr Politik.

Me könntis besser mache mit e bitz Gschick.

So stellt sich dä Maa das eso vor und meint spitz,

regiere solle numme Lütt mit gnueg Grips.

Aber vo sottige Genies gitts leider vill z’wenig.

Drum suecht er au nit noch eme Wält-Keenig.

Er hett sich drum en Algorythmus ussdänggt

Und uns die kynschtligi Intelligenz gschänggt.

E Maschine ganz ohni steerend Emotione

soll d’Lösig bringe und sich fyr uns lohne.

Die Idee ka me sehr guet verstoh,

wenn me s’Regiere dr Ka-i (KI) wurd überloh.

Die wurd besser handle als e Presidänt,

wo geldgeil syner Macht noocherennt.

Mit däre Super-Dängg-Maschine

könnte alli numme gwinne.

Die Ka-i (KI) soll alli unseri Problem löse,

und uns erlöse vo allem Böse.

Wenn die kynschtlig Intelligänz nit versait

Gäbts (KI) kai Krieg, (KI) kai Gwalt, (KI) kai Ungrächtigkeit.

Ganz villi hänn dä Computer programmiert,

ass er denn ungeniert intelligenter regiert.

Si tüehn die Dängg-Maschine drum tanke

mit de beschte und gscheiteschte Gedanke.

All das grosse Wüsse hänn si gnoh

und die Super-Maschine ei Froog rächne loh:

Mir wänn wüsse, wie löse mir Konflikt am beschte?

Die im Oschte, Norde, Süde und au im Weschte?

Die Maschine hett drum in e paar Minute numme,

die geniali Leesig präsentiert fyr uns Dumme.

Es sinn siebe Sache für die ganzi Menschheit.

Das sinn:  Bildig, Kultur, Grächtigkeit,

Verseehnig, wirtschaftlichi Zämme-n-Arbeit,

Diplomatie und internationali Organisatione.

Die sibe Rootschleg solle sich für uns lohne.

Druufabe hänn z’erscht alli grufe „Hurrah!“,

jetzt wisse mir ändligg, wie me Fride mache ka.

Numme öbber hett ganz klever gsait,

wie me au immer die Antwort draiht.

Eigetlig hilft si uns gar nit wytter

Mir sinn nämmli kei bitz gschytter.

Mir müehn drum ygseh nundefahne,

sogar mit dr KI kriege mir kei Leesig aane.

Die Antwort sig eigetlich zum Lache.

Denn d’KI seit,   –  mir müehn dr Fride sälber mache.

Die Ufgoob blibt drum an uns Mensche kläbe.

Do hilft kei KI und dodermit müehn mir läbe.

Die beschte Rootschleeg nutze nyt,

ussfiehre müehn si immer no ächti Lytt.

Es isch wie an der Fasnacht uf dr Gass.

Muesch selber goh; e KI bringt no lang ka-i Spass.