Sujet: S’isch dr Wahn (unseri neye Goschdym)
Dr Wahnsinn griecht duur die kalti Nacht
vernäblet s’Hirni und macht di schwach.
Kasch bhaupte, was immer du wotsch,
Uff „Social Media“ postet jo jede Dottsch.
Im Labyrinth vo Gedanke tanzt dr Wahnsinn anduurend mit.
Dä Wahnsinn spinnt sy Netz, verfolgt ys uf Schritt und Tritt.
D’Ärde sig flach, Corona erfunde in China.
Zue sottige Fake-Fagte passt au ganz prima,
dass öbber sait, dr Hitler sig e Kommunischt,
dr Holokaust e Luug’ und eso „Fake News“ uffdischt.
‘Dr demogratisch gwäälti Selenskyj in dr Ukraine
solli e Diktator sy’, sait dr US-Breesi wäge myne.
Dä „first“ Maa vo Amerika duet lächts und rinks verwäggsle,
Und uss em Golf vo Mexiko dr Golf vo Amerika dräggsle.
Im Griegsgebiet vo Gaza soll e Feerie-Paradies entstoo!
Däm US-Breesi het ebber e baar Tasse uss sym Schränggli gno.
Au z’Europa wänn Regierigs-Breesidänte d‘Gränze schliesse,
und dien – zem d’Griminalität bekämpfe – gege Ussländer schiesse.
D’Statistike beleege, ass villi Griminelli uss em Ussland kemme,
und drum meine si, OHNI die Fremde kennti me ruhiger penne.
Wurd me die Idee mit dr Griminal-Statistig wyter spinntisiere,
Miesst’s fyr alli Männer en Ussgangs-Speeri gä zem d’Verbräche reduziere.
Denn fast alli Griminelle sinn bekanntlig Männer,
Dr Grund fyr s’Beese also, dä hämmer!
Me kennt de Männer derzue no s’Autifaare verbiete,
Will e paar Gaischtesgranggi e ganzi Menschmängi umniete.
Dr Merder hoggt hinter em Längger an dr Wärmi, dr Fuess uff em Bedal,
macht uss däre Bläch-Kischte e Gschoss, wo Mensche verquätscht, s isch letal.
Ohni Männer am Stüür gäbtis keini Raser mee,
Wurdsch uff de Stroose weniger Toti gsee.
Mit Länggerinne wäri au dr „Gender“-Stress im Auti verby.
Numme Parplatzfälder fyr Fraue miesste vill, vill greesser sy.
Doch d’Wält isch verkeert, Griminelli werde als unschuldig erglärt.
Diggdadoore erglääre d’Täter zue Opfer, oder d’Tat syg verjäärt.
D’Gränze vum Verstand verschwimme imme waiche Nääbel,
Die greeschte Liegner schimpfe, brille und ziehn dr verbali Sääbel.
Es fäält an Respäggd und wyrdevollem Stil,
E pfläggdi Dissussion isch däne scho syt langem z’vyl.
Wär andersch dängt, gege dä duet me im Parlament und an de Universitäte hetze.
Und die Wahnsinnige dien die Anderschdänggende so psychisch verletze.
Wer in den USA ins Gfängnis hett miesse,
zum d’Stroof fyr dr Sturm uf s’Capitol abbiesse,
wird vom Breesidänt uusegloo.
Kasch Du das no verstoo?
Wär hett däm Preesidänt sy Hirni gnoo?
Dr US-Breesidänt verfolggt jetz die, wo ihn verurteilt hänn.
Er rächt sich an allne, wo ihm an Graage wänn.
Wär ihm nit passt, wird eifach gschasst.
Dasch scho verruggt, magsch Du jetzt dängge,
aber au bi uns duet dr Wahnsinn d’Politig immer mee längge.
D’Basler Bolizei-Chefin Stefanie Eymann hett Chef-Beamti entloo,
wo iire friener emol Parkbuesse gä hänn; eso han ichs verno.
Dr Erziehigs-Diräggter Mustafa Atici fahrt nymm ins Baselbiet,
ämmel nit uf Rüneberg, wo sich um dr Universitets-Vertrag futiert.
D’Bau-Diräggtere Ästher Keller verschmiert dr Riemeliplatz grad sälber,
und maint in gaischtiger Umnachtig, us Bluemetepf wurde Wälder.
Dr Conradin Cramer als Regierigs-Breesidänt, s’isch zem Lache,
will us em Musical-Theater e Schwimmbadhalle mache.
Dr Wirtschafts-Minischter Kasper Sutter isch so still, dass er kaine steert.
Dä hett in synere Byro-Zälle Pharma-Pille gschluggt, bis er nyt me heert.
D’Finanz-Dirääggtere Tanja Soland – s’isch jo allerhand,
Bringt d’Basler mit irne guete Zaale glatt um dr Verstand.
Nur dr Gsundhaits-Minischter Lukas Engelberger, e ganz e Schlaue,
will nit Bundesroot wärde und losst drfyr d’Psychiatrie ussbaue.
Dr Kanton Baselland isch punkto Irrsinn nit besser dra,
d’Finanze syyge prekär, sait dr Toni Lauber, e gscheite Maa,
me bruuchi mee Styyr-Zahler. Aber s’Volk sait „nai“ – wenn au knapp –
zem Mindest-Lohn und säägt sich eso sälber besseri Styyrzahler ab.
Em ökologischi Griene Isaak Räber hetts ins Hirni gschisse,
dä isch derfyr, ass Autibahne die scheen Landschaft uffrysse.
D’Polizei-Chefin Kathrin Schwizer luegts scho als Verbräche aa,
wenn klaini Binggis mit Spilgäld vo dr Fasnacht Schoggi wänn ha.
Dr Gsundheits-Minischter Thomi Jourdan schwaflet vellig wirr,
will Krankekeschte sänke. Doderfyr isch ihm kei neuis Spital z’tyyr.
Au d’Bildigs-Minischtere Monika Gschwind isch total duur e Wind.
Si suecht verzwyflet d’Leecher fyr Golfbäll. Au die spinnt,
und isch blind fyr d’Leecher im Lehrer-Beschtand fyr d’Schuelkind.
Heersch denn de Junge zue, wie au die scho aföhn spinne,
Fyr si muess d’Gränze zwische Maa und Frau verschwimme.
Bestimmsch di Gender sälber, isch voll im Trend,
Und alli Statistike yber Gschlächter sinn am Änd.
Was ussgseet wie-ne Frau, isch im Härz vylicht e Maa?
Und wehe saisch däre Frau, sii sig e Frau, denne kunnsch dra.
Wär die neyi Ideologie nid wott glaube, muess drfyr biesse
E „Shit-Storm“ soll sich yber dä oder die oder das ergiesse.
Dr Wahnsinn, dä gfährlig Kärli, erkennsch dodra,
ass er kai Witz verschtoht, und kei Humor ka ha.
Die Trumps, Putins und Jipings leen’s lo grache,
Die kenne gar kai freeligi Fasnacht mache.
S’isch e gruusige Totetanz, wo si inszeniere,
jede anderi wurd sich dodrfyr geniere.
In Europa sinn die rächte Parteie am trumpfe,
Andersch d’Sozis und die Griene, die versumpfe.
Vylicht bruucht d’Menschheit dää Wahn vo Rechts,
Amänd sin die Ryppel gar nyt Schlächts?
Die brutali Erfaarig mien mir uns allwäg genne,
Dass Digdadoore nit emol mit Wasser koche kenne.
Epilog
Was unterschaidet denn Mensche no vomme Tier?
Dr Dieter, dr Jeerg, dr Peter und dr Alex und vomme Stier?
Es isch nid dr gläägentligi Drang zueme Fyyroobe-Bier.
Dr Unterschiid zwische dr Gaby, dr Barbara, dr Magdalena
Und emme Zebra isch nit ihri liicht anderi DNA.
Nai-nai-nai! Dr glai Unterschied isch doch nur,
dass sii Fasnacht mache und inveschtiere in Kultur.
Was unterscheidet den Menschen denn noch von einem Tier?
Den Dieter, den Jörg, den Peter und den Alex von einem Stier?
Es ist nicht ihr gelegentlicher Drang zum-Feierabend-Bier.
Der Unterschied zwischen Gaby, Barbara, Magdalena
und einem Zebra ist nicht ihre leicht andere DNA.
Nein-nein-nein! Der kleine Unterschied ist doch nur,
dass sie Fasnacht machen und investieren in Kultur.