Die Haiggle 2017
Es glemmt fascht yberall
D Fäähri hetts nümm ans anderi Ufer gschafft.
D Kabelrolle blybt hängge, hett z‘ wenig Kraft.
Es glemmt! Du hänggsch im Rhy
und dänggsch derby:
Es isch wie im Läbe, es gnorzt und harzt und glemmt,
Dr Lääbensfluss voll Energie hesch du verpennt.
Dr bruefligi Ufschtig blybt stägge im Baum,
D Lohn-Erheechig……….e scheene Traum.
Au in dr Liebi glemmts, s isch unerheert.
Und was mi ganz bsunders steert,
ass jede harmlos-dänggte, romantischi Flirt
bald wäg megliger sexueller Belästigung ufhert.
Und wottsch mol öppis gseh,
so gosch an Seelisee,
Sone Rissverschluss de hebt doch alles zääme,
und wottsch e fine Gnuss,
so ziesch am Rissverschluss,
und die Grittä mues sich gopferdeckggel schääme….
Aber wenn au dä Verschluss no glemmt,
wird di ganz Verlange ungmein hemmt!
Es glemmt im Sport: Es betrifft au die eigene Ziil
Die sinn nid gross, hesch dervo nid vyyl .
Dr Jogging-Dress hesch scho länger nymmi gseh.
Denn di Kerper landet schlaff uff em Kanapee.
E jeedi kerperligi Betätigung isch e Bürde.
D Tür-Schwelle …… e unbezwingbari Hürde.
All das traisch du no mit Würde.
Dr FCB schaffts zwor in d’Champions-League, s’isch e Hit.
aber vor em Goal glemmts, denn Stürmer mache nymme mit.
Es glemmt in dr Basler Politik: Rot-grien isch zwor schigg,
Aber au die mache numme birgerligi Politig.
Es glemmt im Historische Museum bi de Finanze,
Dr Morin tuet sich hinter verpasster Kontrolle verschanze.
D Leitere, die Emanze, hängt ihm schwer am Ranze.
Er setzt si ab, und frisches Bluet muess aatanze.
Au em Baschi Dürr sy Wahlkampf het glemmt, und zwar enorm.
Sy Verornig fir Dienstwääge isch nid konform.
Dr Baschi verspricht Besserig – aber nit uf morn.
Mer warte no hytte! Gross isch em Volgg sy Zorn.
Und ganz andersch als im letschte Johr,
gitts kai Gäld fir d Rambasse, das isch wohr.
Doch mit allzu vyl Geld fühle mir Basler uns nid freier,
d Idee vom Wessels: mer schängges de Waggis an Dreier.
Dr Musik Hug macht zue, will d’Musig nimmi lauft,
will jede Duubel sy Instrument im Internet ykauft.
Aber au d Bschtellig am Computer isch schwer und goht an d Niere:
dr Cursor glemmt, es git kai Surfe, i muess dr schwarz Bildschirm aastiere.
Kei „Reload“ bringt das Ding me zum Laufe. Also ziehn y dr Stecker uuse.
Denn es glemmt die Maschine, i wott eifach numme no pfuuse.
D Baselbieter glemme am Geld und faahre de Bebbi an Kaare:
D Basler Kultur sigi z tüür, und d Universitet solli spaare.
S Baselbieter Staats-Personal kriegt weniger Lohn,
derfyr schaffe sii mehr, es isch e Hohn!
«Wer uffmuggt, fliegt uuse», d Regierig seit amend,
«fyr schnelli Kündigunge ändere mir grad s Reglement.»
Bi Bildig und Kultur heisst de Rambasse iire Find
fiir immer und ewig ….. Monica Gschwind.
Und in de Staate…., aber do isch mer si Name entfalle,
Wie heisst er scho wider? …Er gseht jedefalls uss wiene blondi Schnalle.
Also in de Staate glemmt dä Obama-Noochfolger– es isch nit glatt –
jede wyttere Kontakt zuer Zivilisation eifach ab.
Es glemmt einzig nit bim Tram Nummere 8,
wo dr Gwerb-Verband jo scharf yberwacht.
Aber Basel seit zue däm sym Verdruss:
„Das Schnäppchen-Jagen ist uns ein Muss.
Gib uns unseren täglichen Einkaufs-Tourismus.“
Verglemmi, es isch jo scho Zytt! I hetz in my Fasnachts-Goschtym,
Druck d Larve uf mi Kopf , renn denn uuse ganz ungestüm.
Gib em Schatz schnell e Kuss,
hüpf yne in Fasnachts-Fluss
und scho bin y im Schuss!
Und hoff, y haigg kei Verdruss,
denn glemme kennt no dr Riss-Verschluss.