Mir bruuche kei Sujet – mir sinn kreativ
E Sujet isch e yberuss läschtigi Byrde
Verletzt im Grund gnoh miini Fasnachts-Wyrde.
E Sujet isch wiene yberflissig und eng Korsett,
D’Clique muess sich däm aapasse, s‘isch nit nett.
Koschtym und Larve mien sujet-konform sy
Au dr Zeedel-Schriber stellt sich druff yy,
Mit jedem Sujet aber isch die grossi Freiheit verby.
Mir aber sin kreativ und bruuche drum kei Sujet meh,
an däre Fasnacht kasch das ganz dytlig gseh!
D’Olympia kreirt en eigeti Blaggedde
Stygt uss us dr Fasnachts-Comité-Staffette.
Mir bruuche weder Telebasel, no Regionalradio, no s’Staatsfärnseh.
Mir sammle d’Informatione sälber zämme, was wänn mir meh.
Im Netz kriegsch alli Informatione, muesch si numme finde.
Das Netz isch gratis, an e Monopol muesch di nimme binde.
Und fyr d‘Unterhaltig kasch jetzt Netflix näh.
Fyr was also solls denn no Gebyyre gäh?
Dangg Handy, Computer isch d’Kreativität grenzelos,
I kauf nimm im Lade yy, das find y famos.
I bruch kei Kleidergschäft, kei Buechhandlig, kei Bang.
Mit em Handy parlier y sogar mit em Doggter, wenn i bi krang.
I ordere per Computer, bschtell alles vo dehai,
D’Facebook-Frynde lehn mi derby nit elai.
S‘Baselbiet bruucht kei Stadt-Staats-Theater, bruucht kei Universität.
Und ohni Bildigsrot schaffe d’Schuele wiider ihri Kreativität.
D’Lehrer und d’Lehrere, die schlaue Affe,
kasch derno grad abschaffe,
Denn d’Schieler solle sälber in die gscheite Biecher gaffe.
Und gits denn doch en unleesbar Problem:
Google het d’Antwort; das isch s‘beschte Syschtem.
Dr Wessels bruucht kei Grosse Root,
wo ihm seit, wos duuregoht. Ganz ohni Not
verschenggt er kreativ 1 Million fyrs 3er Trämli,
wo sich verliert irgendwo amene Elsässer Dämmli.
D‘Schwiz bruucht sii nit, die Europäisch Union,
Und spart so villi Millione fyr dä Hohn.
England folgt mit em Brexit de Eidgenosse.
Au in andere Länder wird scharf uff d’EU gschosse.
No isch aber, das losst is hoffe, nyt bschlosse.
Unser Motto haisst drum unverdrosse:
Global denge,
ultranational lengge!
D USA bruucht kei smarte Presidänt an dr Spitze,
Amerika isch kreativ, isch progressiv bis in jedi Ritze.
E Schwarze het das jo au kenne;
und statt die erschti Frau im Renne
Wähle die jetzt – d’Amis sinn jo gar nit dumm! –
Dr erscht Behindert ins Präsidium.
So macht e jede, wies ihm grad passt,
und alles anderi isch ihm verhasst.
50 Johr no ‘68 wird denn das linggi Gschnoor
Ändlig hyperrealistisch und wohr!
Missverstande 1 Wort, will falsch buechstabiert:
Bi «Solitäritet isch Trumpf» isch d’»Solidaritet kollabiert».
Die Haiggle 2018