Die Haiggle 2019

 

Sujet: Mir heebe zämme

 

Me heert das Johr jo allerhand:

En Insle löst sich vom feste Land.

Die Europäisch Union isch England z’tüür

Dä Zämmeschluss villne au nümm ghür.

Aber jetzt, wo Brexit nöcher kunnt, dr Gedanke scho bald verstummt.

S’isch ebe wie ne Partnerschaft, wo verliert an syner Kraft.

Goht eine fremd, macht dä zwor villes  krumm,

Aber drum sich grad scho trenne, isch villicht genauso dumm.

Amänd heebe si doch wiider zämme,

Wenn sich beidi e bitz ins Füdle klemme.

 

In Zyttige, däm intellektuelle Frass, ha-n-ich no gläse das:

Schwizer Firme verkaufe sich an d‘Chinese,

und hoffe, eso könne si wiider genese.

Z’Dütschland gitts e paar, die wänn freyi Riichsbürger sy.

Si reklamiere, dä Staat sig für sy endgültig verby.

In Frankrich meine gälbi Weschte, si sige doch die Beschte;

Sogar no besser als dr Preesi Macron

Und sage: C’est la Musique, qui fait le ton.

De Italiener hetts scho lang d’Lega Nord ynegschneit.

Kei Wunder, ass jede Schüeler gege Klimawandel schreit.

In de USA muesch numme  e grossi Schnuure ha

Denn bisch im Wysse Huus e gmachte Maa.

Z‘Russland anglet dä Putin mit de Panzer noch dr Krim.

In Syrie kunnsch au nümm druss,

Wer mit wem und worum. S’isch e harti Nuss.

 

S’kunnt eim vor wie in dr Schuel, wo d’Lehrer nümmi s’Sage hänn

Und Schüeler jetzt bestimme, wie si dr Unterricht gstalte wänn.

Dr Trömpli, wo schloft in Mathe und de Meitli nochegafft,

Hetts einewäg zum Klassesprecher gschafft.

Dr bösi Putin, wo in dr Pause die Kleine bloggt,

Jetzt mit em Lineal frech am Lehrer-Pult hoggt.

Dr Erdogan, dä truurig Pflock,

sorgt fyyr Ornig mit em Stock.

Dr Maduro, dä glai Maa uss em färne Venezuela,

seit zem Guaido: „My Macht darfsch Du nit ha.“

Das kapiert sogar dr blöd Bolsonaro uss Brasilie.

Seit ungeniert zur diktatorische Buebe-Familie:

„Ich finds e Hit und mach bi Euch gern au no mit.“

 

Vo Rächtsschribig hänn die Buebe nüt begriffe.

Drum tüen si au uf d‘Grammatik pfyffe.

Mol twittere si gross, denn wiider klei,

Und erfinde d’Regle allewyl ganz neui.

Die alti Ornig gheit usenand. Jede Gscheite verliert fast dr Verstand.

Woraa solle Schüeler denn, die arme Schlugger, no glaube,

wenn eim die Sürmel an dr Spitze d’Orientierig raube?

Kunnt ein und kritisiert die verkehrti Welt: „Dasch e Gruus.“

Heebe di Dumme grad zämme und schimpfe:  „Fake News“.

 

Au mir heebe zämme in dr Not,

Will uns sunscht s’Lache vergoht.

Wenn mir uns bsinne, könne mir nur gwinne.

Was uns d’Gschicht jo lehrt: Die alte Wärt sinn gar nit so verkehrt,

au wenn dr eint oder die anderi sich dra steert,

ass mängisch e Konflikt zum Gmeinschafts-Läbe gheert.

Mir heebe zämme gege jedes Lumpepack.

Liebe Santiglaus, bitte steck die doch in Jutesack.

 

Fasnacht isch e dreytägig Demonstration

Fyyr Solidaritet und gege jede Pause-Gloon.

Mir heebe zämme, und klammere nit.

Mir sueche d‘Verbindig, wos zwüsche uns gitt.

Mir pfläge Wunde, stille Schmärz,

Marschiere in de Gasse mit offnem Härz.