Heb Di fescht
Ich weiss nyt, ob dr Grönemeyer hit no lacht,
wenn er uf dr Byyhni singt: „Kinder an die Macht“.
Sy Wunsch isch leider in Erfyllig gange,
und Kinder heebe in dr Politig d‘Stange.
Männer mit Falte – kunnsch druss –
läbe ihr kindlig Gmiet voll uss.
Si sin geistig blind wie ne Kind, nämme alles perseenlig,
Si sin schnell verstimmt und blyybe unversehnlig:
„Was, Du hesch mi beleidigt!!!!
I mach grad Di Sandburg kaputt,
Riss Dym Ditti alli Hoor uss,
Schiss uf Di Teddybär,
Versuudle Di Moolheft,
Verstegg Dyni Durnschueh,
Schmeiss Dyni Lego in Rhy,
Lüftele Di Velopneu,
Und friss Dyni Däfi uff.
So, jetz hesch dr Drägg!
Wüsch Du dä sälber ewägg!
Du bisch Schuld, ganz ellai
an däre Riise-Sauerei.“
Eso spucke die Kindskepf enander in d’Suppe.
D‘Regierigs-Gschäft verkemme zue Spiil-Gruppe.
Und wenn die Machthungrige gyrig zem Midaags-Tisch renne,
könnte me d‘Regierigssitz au die allertyyrschti Kita nenne.
Wäge dr neye Computer-Technik isch es leider passiert,
ass me numme no isoliert mit syne Schätzli kommuniziert.
Fridlig läbt a jede in synere Wält dehai,
Und fyhlt sich ungsteert aber nyt elai.
„Follower“ und Frynde hän sii jo vyyl,
und die teggschte alli im glyyche Stil.
Si bewege sich mit de Stepsel in de Ohre in dr grosse, wyte Welt,
Und d Auge stiere ufs Handy, wo die gscheiti Usenandersetzig fählt.
Si wysse nyt, wänn nyt wysse, sin sowieso gscheiter.
Uf die Art wird die bildigsferni Schicht als wie breiter.
Im Geischt sin die Erwachsene no Kinder blyybe,
Wo still dängge – s isch nyt ybertryybe:
„Bin ich emol an dr Macht,
Tramp i alli in a tiefe Schacht.“
Was me friehner numme unter Bekannte het verzellt
Schrybt me hyt uf em Smartphon an die ganzi Welt.
Jedes glai Ärgernis wird ufbauscht zem grosse Zorn.
Jede Furz grootet uf Twitter bitter zum „Shitstorm“.
Alles, wo dr verletzte Seel nyt ins Weltbild passt,
isch en Uffreeger. Wer doo nit korrekt ufpasst,
macht sich uf de „Social Media“ schnell verhasst.
Wie sinnig isch das Fasnachts-Motto „Heb Di fescht“.
D Blaggede zeigt Fasnächtler uf em Trottinett, das isch s bescht.
Das Fahrzyg us vergangener Kinderzyt
Finde au Erwachseni e „Mega-Hit“.
E jede wott soone E-Fahrzyg miete,
zum ändlig Klimaschäde verhiete.
Sait dr Minder zum Hasler:
„Wer nyt gumpt, dä isch kai Basler.“
Sait dr Hasler zum Minder:
„Wer nyt lauft, dä isch gschwinder.“
Die Wält isch mir nimmi ghüür:
„La vie est dure sans confiture“.
Aber jetz isch au no dr Angge ranzig
uf em trockne Brot im Johr 2020.